நீங்களும் வெல்லலாம் 3.2 லட்சங்கள்!

எப்படினு கேக்கிறீங்களா? மொதல்ல நீங்க ஒரு பிரபலமாக இருக்கனும்! இல்லையா? அப்போ உங்களுக்கு பொது அறிவு கம்மியாத்தான் இருக்கும். நீங்க ஒரு 10,000 ரூபாய்வரை வேணா வெல்லலாம்! அம்புட்டுத்தான்!

நீங்களும் வெல்லலாம் ஒரு கோடி ஷோ  சாதாரண பொதுமக்கள் கலந்துகொண்டு நடக்கும்போது நம்ம "மிஸ்டர் ஜீனியஸ்" ஓரளவுக்கு மிகவும் நியாயமாக நடந்துக்கிட்டாரு. நான் பார்த்தவரைக்கும் நிச்சயமாக தரமான ஒரு ஷோ போலதான் இருந்தது. ஆனால் அதில் பிரபலங்கள் கலந்துகொண்டு அவர்கள் "மிஸ்டர் ஜீனியஸ்" கேள்விகளுக்கு பதில் சொல்லும்போது ஏதோ இடித்தது.

பிரபலங்கள் வெல்லுகிற பணம்,  இல்லாதவர்களுக்கும், தேவையானவர்களுக்கும்தான் போய் சேருகிறது. தான் வென்ற தொகையை இவர்கள் இல்லாதவர்களுக்கு கொடுப்பது பாராட்டவேண்டிய விசயமென்றாலும், அந்தப் போட்டியும் நியாயமாக நடத்தப்பட வேண்டும். ஆனால் பிரபலங்கள் கலந்து கொள்ளும்போதும் "மிஸ்டர் ஜீனியஸ்" நியாயமாக நடந்துகொள்கிறாரா?

பொதுமக்கள் கலந்து கொள்ளும்போது நிறையப் படித்தவர்கள்கூட சில சில்லி மிஸ்டேக்ஸ் செய்து 3000, 40,000 னு குறைந்த தொகையுடன் வெளியேறுவதை நீங்க பார்க்கலாம். பொது அறிவு மேட்டர்ல யாரு வேணா தடுமாறலாம், அதுதான் உண்மை! ஆனால் நம்ம பிரபலங்கள்  ஒரு 10,000 ரூபாய்க்கு குறைவாக வென்று, அந்தப் பணத்துடன்  வெளியேற்றப்பட்டுப் போவதை நீங்க பார்ப்பது அரிதிலும் அரிது. நான் இதுவரை பார்க்கவில்லை. அது ஸ்ருதிஹாசனாக இருக்கட்டும், இல்லைனா சத்யராஜாக இருக்கட்டும், இல்லைனா ராதாவாக இருக்கட்டும்,  இவர்கள் குறைந்தது ஒரு ரூ 3.2 லட்சங்கள்  ஈட்டிய பிறகுதான் வெளியேறுவார்கள்.
3.2 லட்சத்தொகை  வென்றபிறகுதான் நிஜமான போட்டியில் கலந்துகொள்ளும் த்ரில்லை நீங்க காணலாம்.

அது எப்படி??

எனக்கென்னவோ  இவர்கள் "ஞானசூனியம்" என்று பொதுமக்களிடம் அவமானப் படக்கூடாது என்று மெனக்கெட்டு  குறைந்த பட்சம் ஒரு பத்துக்கேள்விக்காவது பதில் சொல்லி, அவங்க மானத்தைக் காத்துக்கொள்ளனும் என்ற எண்ணத்தில் இவர்களுக்கு கேள்வித்தாள் முன்னாலேயே கொடுக்கப்படுகிறதுனு தோனுது. நீங்க அவர்கள் பதில் சொல்லும் விதத்தை கவனித்துப் பார்த்தால்  உங்களுக்கும் விளங்கும்.
ஏழைகளுக்கு அந்தப் பணம் போய் சேருகிறது என்கிற ஒரு காரணத்தால் பொதுமக்களும் அவர்கள் நல்லா ஆடனும்னுதான் எதிர்பார்க்கிறார்கள்.

ஆனால், விஜய் டி விக்கு அவங்க அழைத்துவரும் பிரபலங்களுடைய மானம் கப்பல் ஏறிவிடக்கூடாது என்பதுதான்  முக்கியமாக இருப்பதுபோல் தோனுது. இல்லைனா நம்மள வலிய அழச்சுண்டு வந்து  இங்கே உக்கார வச்சு, விஜய் டி வி காரனுக கேவலப்படுத்திடுவானுக பிரபலங்கள் இந்தப் போட்டியில் கலந்துக்க மாட்டாங்க.

எதைச் செய்தாலும் நம்மாளுக செய்றவிதம் ஒரு தனி விதமாகத்தான் இருக்கும்!