பதிவுலகில் பெண்பதிவர்களுக்கு பிரச்சினை பிரச்சினை பிரச்சினை!

பதிவுலகில் பெண்பதிவர்களுக்கு அந்தப்பிரச்சினை, இந்தப்பிரச்சினை என்று பேசுவது இந்தப் பெண் பதிவர்கள் பிரச்சினையை முற்றுப்புள்ளி வைத்து முடிக்க முடியாத ஒரு நிலைமையைத்தான் உருவாக்குது. என்னைப்பொறுத்தவரையில் இன்றைய நிலையில் பதிவுலகில் ஆணும் பெண்ணும் சமமாகத்தான் இருக்காங்க. பதிவுலகில் பெண் பதிவர்கள் பலர் மிகத்தரமாக எழுதுகிறார்கள், தங்களுக்கென்று ஒரு மிகச்சிறந்த இடத்தை பெற்றுள்ளார்கள். அதனால் ஆண்பதிவர்கள், பெண்பதிவர்கள் என்று தேவையில்லாமல் பிரித்து பேச வேண்டிய அவசியமே இல்லை!

பதிவுலகில் ஒரு சில சமயங்களில் பெண்கள் தாக்கப்படுவதை எல்லோரும் கவனித்துப் பார்த்துக்கொண்டுதான் இருக்கோம். ஏன் ஆண் பதிவர்களும்தான் தாக்கப்படுகிறார்கள். அப்படி ஒரு சூழலில் பாதிக்கப்பட்ட பதிவருக்கு பல பதிவர்கள் துணைநிற்கிறார்கள், தைரியம் கொடுக்கிறார்கள், தங்களால் ஆன உதவியை செய்கிறார்கள். தவறு செய்தவர்களை கண்டிக்கிறார்கள், வார்த்தைகளாலேயே, இல்லை பதிவுகளாலேயே தண்டிக்கிறார்கள். ஆனால், சில காலம் சென்ற பிறகு, அது நடந்து முடிந்த ஒண்ணுனு அதை விட்டுவிட்டு , மறந்துவிட்டு நாம் முன்னோக்கி நடக்க வேண்டும்! பல மாதங்களுக்குப் பிறகு நடந்து முடிந்த பல பிரச்சினைகளை கிளறிக்கிளறி எடுப்பது தவறு செய்து தன் தவற்றை உணர்ந்த சில ஆண்பதிவர்களை மறுபடியும் மறுபடியும் அதையே சொல்லிச் சொல்லி அவமானப்படுத்துவது போல எனக்குத் தோனுது.

தவறு செய்த பதிவர்கள், தண்டிக்கப்பட்டுவிட்டார்கள், இப்போ திருந்தி பழசை மறந்து மேலும் நல்லா எழுத முயலுகிறார்கள். அப்படி ஒரு சூழலில் திரும்பத் திரும்ப அவர்கள் செய்த தவறுகளை கிளறி எடுப்பது போல் அதைப்பற்றிப் பேசி அதை கிளறி எடுப்பதை முதலில் நாம் தவிர்ப்பது நல்லது. ஆண் பதிவர்களுக்கு எந்தவிதத்திலும் பெண் பதிவர்கள் சளைத்தவர்கள் அல்ல என்பதில் எதற்கு யாருக்கும் சந்தேகம் வருதுனு தெரியவில்லை.

என் பார்வையில் வம்பில்லாமல் தன் கருத்தைத் தரமாக நாகரிகமாக, தைரியமாக சொல்லும் பெண்பதிவர்கள் பலர், பதிவுலகில் ஆண்களைவிட சிறப்பான இடத்தில் இருக்காங்க. அவர்கள் தரம் புரிந்து அவர்கள் பதிவுக்கு பின்னூட்டம் இடும் பதிவர்களும், நாகரிகமாக, அர்த்தமாக, நட்பு குறையாமல் எதிர்கருத்தையும் வைக்கத்தான் செய்கிறார்கள். அதுபோல் எழுதும் பெண்பதிவர்கள் எந்தவித பயமும் இல்லாமல் தன் கருத்துக்களை நாகரிகமாகத் தெரிவித்து நாளுக்கு நாள் மேலே போய்க்கொண்டுதான் இருக்காங்க. அதை யாராலும் தடுக்கவோ நிறுத்தவோ முடியாது.

எந்தப்பதிவருமே (ஆணென்ன பெண்னென்ன இதில்) வம்பில்லாமல் எழுதும்போது அவர்கள் எந்த ஒரு பிரச்சினையிலும் மாட்டுவதில்லை. அப்படியில்லாமல் கொஞ்சம் மற்றவரை சீண்டுவதுபோல், அவமானப்படுத்துவதுபோல் எழுதப்படும் ஆண்பதிவர்கள் பதிவுகளும், அந்தப் பதிவர்களும்தான் சில சமயம் தாக்கப்படுகிறார்கள். இதுபோல தாக்கப்படும் பதிவர்களில் ஆண்களும் உண்டு. ஆண் என்று யாருக்கும் ஸ்பெஷல் ப்ரிவிலேஜ் கொடுக்கப்படவில்லை!

என்னைக் கேட்டால் இந்த 21 ஆம் நூற்றாண்டில் இருந்துகொண்டு இணையத்தில், இன்னும் பெண்களுக்கு முழு சுதந்திரம் வரவில்லை என்பதுபோல பேசும் பெண்ணியவாதிகள்தான், பெண்களை மேலே வளரவிடாமல் தடுப்பவர்கள்.

மேலும் இவர்கள் எழுதும் எழுத்தில் இருந்து ஆண்பதிவர்கள் தங்களுக்கு உதவனும் என்று வேண்டுகிறார்களா? இல்லை கட்டளையிடுகிறார்களா? இல்லை உதவுவதில்லைனு குறை கூறுகிறார்களா? என்பது அவர்கள் எழுதும் தொணியில் சரியாக விளங்கவில்லை!

சரி, Happy New Year to everyone! :)