பச்சைத் தமிழன் வடிவேலுவும் தமிழின துரோகிகளும்!

வடிவேலு போன்ற ஒரு திறமையான நடிகன் தமிழ் திரையுலகில் முளைப்பது வெகு வெகு அரிது. வடிவேலுவை ஒரு திரைப்படக் கலைஞனாக வெள்ளித்திரையில் பார்த்து இரண்டு வருடங்களுக்கு மேல் ஆகிறது. கடந்த இரண்டு வருடங்களாக வடிவேலுவை, அவர் திறமையை மதித்து, சகநடிகனாக  வைத்து நடிக்கவோ, அல்லது அவரை வைத்து சினிமா எடுக்கவோ ரஜினி மற்றும் கமல் முதல்க்கொண்டு எவனும் முன்வரவில்லை!

 








காரணம்?

அரசியலில் வடிவேலுவின் அநாகரிகப் பேச்சு! வடிவேலு சப்போர்ட் செய்த கட்சி படுதோல்வி!

அதற்கும் கலைஞன் வடிவேலுக்கும் என்ன சம்மந்தம்??? ஒரு கலைஞனின் அரசியல் நிலைப்பாடு எப்படி அவன் தொழிலை பாதிக்கலாம்? பாதிக்கக்கூடாது! என்றெல்லாம் நீங்கள் வியாக்யாணம் பேசினால் உங்களை சரியான முட்டாளாகப் பார்க்கும் "முன்னேறிய" உலகம் இது!

காங்கிரஸ் கட்சியைச் சார்ந்த காமராஜ் தமிழ்நாட்டை ஆளும்போது, இப்போதுதான் ஒரு "பச்சைத் தமிழன்" தமிழ் நாட்டை ஆள்கிறான் என்று முழு ஆதரவு கொடுத்தாராம் தந்தை பெரியார். காமராஜ், காங்கிரஸ்காரர், இறைநம்பிக்கை உள்ளவர் என்பதையெல்லாம் தூக்கி எறிந்துவிட்டு, காமராஜை ஒரு தமிழனாக தந்தை பெரியாரால் மட்டும்தான் பார்க்க முடிந்தது. ஒரு பச்சைத்தமிழன் தமிழ்நாட்டை ஆள்வதுதான் தமிழர்களுக்குப் பெருமை என்றாராம் தந்தை பெரியார்!

அதுபோல், வடிவேலுவை ஒரு தமிழ்க் கலைஞனாக, திறமை மிக்கத் தமிழ் நகைச்சுவை நடிகனாகப் பார்க்க, அவர் ஆளுமையைப் பாராட்ட இன்று தந்தை பெரியாரும் இல்லை! வடிவேலுவை தமிழ் கலைஞனாக நோக்கும் சுத்தமான பெரியார் தொண்டர்களும் இன்று இல்லை!

ஒரு திறமைமிக்க நடிகனைக் கண்டுபிடித்து, அவன் திறமையைக்கண்டு வியந்து, அவனை வெள்ளித்திரைக்குக்  கொண்டு வருவது மிகவும் கடினம். ஆயிரக்கணக்காக திறமைமிக்க நடிகர்கள் திரைப்படத்தில் தோணாமலே வாழ்ந்து செத்துக் கொண்டுதான் இருக்கிறார்கள். ஆனால், ஒரு சிலரை, அப்படி கண்டெடுத்து அவர்கள் மக்களை மகிழ்விக்க திரைக்கு கொண்டுவரப்படுகிறார்கள். அப்படி கண்டெடுக்கப்பட்ட ஒரு திறமைமிக்க  கலைஞனான நம்ம வடிவேலுவை, சரிவர பயன்படுத்தாது, கேவலம் அரசியல் காரணங்களால், அந்த அபூர்வக் கலைஞனைத்  தூக்கி எறிவது, தமிழனுக்கும், தமிழ் கலைஞனுக்கும், தமிழ் கலைக்கும், தமிழர்கள் செய்யும் மிகப்பெரிய துரோகம்!