Sex and the City

உங்களுக்கு கூடுதலாக ஒரு எக்ஸ் க்ரோமோசோம் இருக்குமானால் உங்களுக்கு இந்த படம் நிச்சயம் பிடிக்கும். :) முழுக்க முழுக்க பெண்கள் ரசிக்க மட்டும் எடுக்கப்பட்ட படம் என்பதால் திரையரங்கு முழுவதும் பெண்கள் கூட்டம். திருவிழாவுக்கு பலி கொடுக்கப்படும் ஆடுகள் போல ஒரு டைப்பாக முழித்துக்கொண்டே தங்கள் கேர்ள்ப்ரெண்டுகளுக்கு காவலாக மொத்தம் 4 ஆண்கள் தான் இருந்தனர். HBO-வில் சூப்பர் ஹிட் தொடராக வந்த செக்ஸ் அண்ட் த சிட்டி தான் முழு நீள(ல?) படமாக வெளி வந்து இருக்கிறது.

நாற்பது வயதுக்கு மேலாகியும் திருமணமாகாத, நிறைய படித்த, தைரியம் மிக்க நாலு நியூயார்க் பெண்களைப்பற்றிய கதை இது. நவீன கால பெண் பிரம்மச்சாரிகள். எதை பற்றியும் கவலைப்படாத இதை போன்ற பெண்கள் இந்தியர்களுக்கு மட்டுமல்ல, அமரிக்கர்களுக்கும் ரொம்ப புதுசு.

கதையின் கதாநாயகி கேரி ப்ராட்ஷா(சாரா ஜெசிகா பார்க்கர்)ஒரு எழுத்தாளர். இவருடைய கம்ப்யூட்டர் திரையில் தோன்றும் பன்ச் வரிகளுக்காகவே இந்த தொடரை பார்த்தவள் நான். நிறைய ஆண்களை டேட் பண்ணிவிட்டு கடைசியில் தன் நீண்டகால ஆண் நண்பரான மிஸ்டர்.பிக்(ஆமாம், நீங்கள் நினைக்கும் அதே காரணப்பெயர் தான் :))-கையே திருமணம் செய்துக்கொள்கிறார். அவர்கள் திருமணம் கடைசி நேரத்தில் நின்று போகிறது. பிக் பின்வாங்கிவிடுகிறார்.

அடுத்த தோழியான சமாந்தா(கிம் கெட்ரால்) தன்னுடைய ஹாலிவுட் பாய்ப்ரெண்டுடன் செட்டில் ஆகிறார். இப்படி செட்டில் ஆவது சமாந்தாவை பொறுத்தவரை அதிசயம். சமாந்தா ஒரு ப்ளே கேர்ள், ஒரே ஆணுடன் செட்டில் ஆவது அவருக்கு பிடிக்காது.

பிறகு நம்ம ஸ்வீட் சார்லட்(க்ரிஸ்டின் டேவிஸ்)யூதரான ஹாரியை திருமணம் செய்துக்கொண்டு பிறகு குழந்தை இல்லாத காரணத்தால் ஒரு சைனீஸ் குழந்தையை தத்தெடுக்கிறார். ஆனால் குழந்தை ஆசை மட்டும் இவரை விடவில்லை.

நான்காவதாக மிராண்டா(சிந்தியா நிக்சன்)தன் கணவர் ஸ்டீவ் மற்றும் 1 வயது குழந்தை ப்ரேடியுடன் மன்ஹாட்டனில் வாழ்ந்து வரும்போது எதிர்பாராத ஒன்று நடக்கிறது. இவருடைய அன்பு கணவர் வேறு ஒரு பெண்ணுடன் தொடர்பு வைத்துக்கொள்ளுகிறார். ஆவேசமாகும் மிராண்டா தன் கணவரை பிரிந்துவிடுகிறார்.

கடைசியாக என்ன நடந்தது? கேரியின் கல்யாணம் நடந்ததா, சமாந்தாவால் ஒரே பாய்ப்ரெண்டுடன் வாழ முடிந்ததா, சார்லட்டுக்கு குழந்தை பிறக்குமா மற்றும் மிராண்டாவுக்கும் ஸ்டீவுக்கும் சமாதானமாகுமா போன்றவை மீதி கதை. கடைசியில் எல்லா பிரச்சினைகளுக்கும் காரணமாக நினைப்பவர்கள் உண்மையான காரணமே இல்லை, நம்முடைய பிரச்சினைகளுக்கு எப்படி நாமே காரணமாக மாறுகிறோம் என்பதை அழகாக விளக்கி இருக்கிறார்கள்.

இந்த படம் கடைசியில் தேவதைக்கதைகளில் வரும் முடிவு போல முடிகிறது "And they lived happily ever after". கூடவே பெண்களைக்கவரும் எல்லா விஷயமும் உண்டு. செக்ஸ், fashion, ஸ்டைல், திருமண உடை மற்றும் ப்ளானிங். ஆனால் ஆண்களுக்கும் இந்த படம் பிடிக்கும்(நிறைய ஜில்பான்ஸ் மேட்டர் இருப்பதால்)

படத்தில் நீல நிற ட்ரெஸ் - மிராண்டா
கருப்பு - சார்லட்
மணப்பெண் - கேரி ப்ராட்ஷா
சிகப்பு - சமாந்தா

பின்குறிப்பு: இங்கே வருண், ஆண்களைக்கவரும் இண்டியானா ஜோன்ஸ் போன்ற லொள்ளு பட விமர்சனம் எழுதி வருவதால், பழிக்கு பழியாக "செக்ஸ் அண்ட் த சிட்டி" போன்ற chick flicks பட விமர்சனம் எழுதுகிறேன் என்று தெரிவித்துக்கொள்ளுகிறேன். இவர் தன் போக்கை கைவிடாவிட்டால் நான் கோலங்கள் சீரியலுக்கு எல்லாம் விமர்சனம் எழுதவேண்டி இருக்கும் என்பதையும் தாழ்மையாக தெரிவித்துக்கொள்ளுகிறேன்.