அமெரிக்காவில் பெட்ரோல் விலை மலிவான ரகசியம்!

ஒரு Gallon , அதாவது 3.78 லிட்டர்கள் பெட்ரோல் அல்லது கேஸோலீன் விலை இப்போ ரெண்டு டாலருக்கும் குறைவாக உள்ளது! இதுபோல் கேஸோலீன் விலை குறையும் என்று யாரும் கனவில்கூட நினைத்துப் பார்க்கவில்லை.

regular gas: $ 1.99

என்ன காரணம்?

அமெரிக்காவுக்கு தேவையான ஆயில், இங்கேயே புதிய தொழில் நுட்ப முறையில்  தோண்டி எடுக்கப் படுகிறது. இதனால் வெளிநாடுகளில் இருந்து ஆயில் இறக்குமதி செய்வதை அமெரிக்கா குறைத்துள்ளது. விளைவு?  ஒரு பக்கம் அமெரிக்க பொருளாதாரம் திடமாகி உள்ளது. அமெரிக்க டாலர் வால்யூ திடமாக ஆகியுள்ளது. அமெரிக்கா ஆயில் இறக்குமதியை குறைப்பதால் பாதிக்கப்படுவது யாருனு பார்த்தால்..ஆயில் ஏற்றுமதியையே நம்பி வாழும்  ஈரான், ரஷ்யா, வெனிசூலா போன்ற நாடுகள். இந்நாடுகளில் பொருளாதாரம் மிகவும் பாதிக்கப்பட்டுள்ளது.

திடீர்னு எப்படி அமெரிக்காவில் ஆயில் அதிகமாக கிடைக்கிறது? பூமிக்கு கீழே பல ஆயிரம் அடிகளுக்கு கீழே உள்ள ஆயிலை தோண்டி எடுப்பது கடினமாக இருந்தது. இப்போது ஃப்ராக்கிங் னு ஒரு தொழிநுட்ப  முறையில் பல ஆயிரக்கணக்கான அடிகளுக்கு கீழே உள்ள ஆயிலை  மேலே கொண்டு வந்துவிடுகிறார்கள். சமீபத்தில் இந்தத் தொழில் நுட்பத்தில் அமெரிக்கா பெரிய முன்னேற்றமடைந்து உள்ளது. இந்த தொழில்நுட்ப முன்னேற்றம்தான் இதற்கு காரணம் என்கிறார்கள்.



அதென்ன ஃப்ராக்கிங்?

ஆங்கிலத்தில் சொல்லணும்னா Hydraulic Fracturing (fracking) என்பார்கள்.

ஆங்கிலத்தில் சொன்னால் மட்டும் புரிஞ்சிடப்போதாக்கும்? விளக்கத் தெரியலைனா தெரியலைனு சொல்லு வருண்! னு சொல்றீங்களா?

அதாவது பல ஆயிரக்கணக்கான அடிகள் (மைல் கணக்கில்) கீழே இருக்கும்  எரிவாயு மற்றும் எண்ணெய்யை சாதாரண முறையில் தோண்டி எடுப்பது கஷ்டமாக இருந்தது. இப்போ இந்த ஃப்ராக்கிங்  என்கிற புதிய முறையில் அதை மேலே கொண்டு வந்து விடுகிறார்களாம்.

மேலே உள்ள படத்தைப் பாருங்க

இப்போ புரியுதா?

இம்முறையை செயல்ப்படுத்துவதற்கு நெறையா தண்ணீர் தேவைப்படுகிறது என்கிறார்கள். முதலில் ஒரு சின்ன கிணறு கீழே  பல ஆயிரக்கணக்கான அடிகளுக்கு செங்குத்தாக (vertically) தோண்டுவார்கள், அதன் பிறகு இதே கிணறை தொடர்ந்து கீழே கிடைமட்டமாக  (horizontally) தோண்டுவார்கள்.  இப்படி தோண்டியவுடன் ஆயில் மேலே வந்துவிடாது. ஆயில் அதை சுத்தியுள்ள பாறைகளால் மறைக்கப்பட்டு இருக்கும். இப்போ அந்த கிணற்றின் மூலம் தண்ணீர், மணல் மற்றும் உப்புக்கள் கலந்த ஒரு கலவையை அதிகமான அழுத்தத்தில் செலுத்துவார்களாம். அப்படி அதிக அழுத்தத்தில் இந்தக் கலவையை செலுத்தி அடியில் உள்ள பாறைகளை வெடிக்கவைத்து லேசாக கீறல்கள் ஏற்படுத்தி உடைத்துவிடுவார்களாம். அப்படி பாறைகள் இடையில் ஏற்படுத்தப்பட்ட பெரிய பெரிய கீறல்கள் மூலமாக ஆயில் மற்றும் எரிவாயு மெதுவாக கசிந்து வந்து அப்படியே தண்ணீர் நிறைந்து உள்ள அந்த கிணற்றில் கலந்து, ஆயில் மற்றும் எரிவாயு  டென்ஸிட்டி குறைவாக உள்ளதால் மேலே வந்துவிடுமாம்.

இன்னும் புரியலையா? அப்போ இந்த வீடியோவைப் பாருங்கப்பா! என்னை ஆள விடுங்க!

https://www.youtube.com/watch?v=VY34PQUiwOQ#at=287

குறைபாடுகள்:

இந்த முறையில் ஆயில் எடுப்பதால், மேல் மட்டத்தில் உள்ள தண்ணீரில் எரிவாயு மற்றும் ஆயில் கலந்து, தண்ணீரை "கண்டாமினேட்" பண்ணிவிடும் என்கிறார்கள். மேலும் நிலநடுக்கம், நில அதிர்வு போன்ற பிரச்சினைகள் அதிகமாகும் என்கிறார்கள். அதனால் இந்த ஃப்ராக்கிங் தொழில்நுட்பத்துக்கு எதிர்ப்புகளும் உண்டு.