சாருவுக்கு ரொம்ப கெட்ட நேரமா?

தமிழ் எழுத்தாளர் சாரு நிவேதிதாவுடன் கருத்து வேற்றுமை வருவது, அவர் எழுத்தில் உள்ள குறைகள் விமர்சனத்துக்குள்ளாவது எல்லாம் பதிவுலகில் ரொம்ப சாதாரண விசயம். பலரையும் விமர்சனம் செய்யும் எழுத்தாளர் யாரும் விமர்சனத்துக்குள்ளாவது தவிர்க்க முடியாது. இது போல் விமர்சனங்களால் மேலும் மேலும் "நொட்டோரியஸாக" பிரபலமானவர் சாருனு கூட சிலர் இவர் புகழ் பாடுவதைப் பார்க்கலாம். இவரைப் புகழ்ந்து, இவரை ஆதரித்து தன் பிழைப்பை ஓட்டுபவர்களும், இவரை விமர்சனம் செய்து தன் பதிவுகளை வாசிக்க வைப்பவர்களும் கணக்கிலடங்காது.

ஆனால், சமீபத்தில் இவருக்கு வேறு விதமான பிரச்சினைகள் ஆரம்பமாகி யுள்ளது. பிரபல பதிவர் ஒருவர் இவர் எழுதியதாக வந்த ஒரு சில சிறு கதைகள் இவருடையதல்ல! அந்த கரு மற்றும் கதைக்கு சொந்தக்காரர் இன்னொருவர் என்கிற குற்ற்ச்சாட்டை வைத்தபோது அதைப் பார்த்து நான் உண்மையிலேயே ஆடிப் போயிட்டேன்.

சாரு நிவேதிதாவா இப்படி எல்லாம் செய்வார்? இவர் அந்த அளவுக்கு கீழே இறங்கிப்போகும் அளவுக்கு என்ன அவசியம்? என்கிற குழப்பத்தின் மேலே குழப்பம். ஆனால் இந்த "கதை திருட்டு" விசயத்தை பொய் என்று யாரும் அடித்து சொல்ல முன்வரவில்லை! இவருக்கு தினம் ஜால்ரா அடிப்பவர்களும் இது பொய் குற்றச்சாட்டு என்று சொல்ல முன்வரவில்லை! இது பலரையும் தைரியமாக விமர்சிக்கும் ஒரு போஸ்ட்-மாடர்ன் எடுத்தாளருக்கு மிகப்பெரிய அடி, சறுக்கல் என்பதை யாரும் மறுக்க முடியாது.

அது போதாதென்று இன்று இன்னொரு பெரிய சறுக்கல்! இவர் கடவுளைக் கண்டேன் என்று யாரை ஒரு நல்ல சாமியார், கடவுள் என்று கட்டுரை மேல் கட்டுரை எழுதி சொல்லிக்கொண்டு இருந்தாரோ அந்த, சுவாமி நிதயானந்தாவுடைய வீடியோ பிரபல தொலைக்காட்சியில் வெளி வந்துள்ளது. எப்படி? இன்னொரு நடிகையுடன் படுக்கையில் இவர் இருப்பதுபோல. யாரு? நம்ம கடவுள் நித்யானந்தா!! நம்ம ஊர் "கடவுளுக்கு" இது சாதாரணம்தான்னு நீங்க சொல்லலாம். ஆனால் நித்யானந்தா, தான் பெண்களுடன் உறவுகள் வைத்துள்ளதாக இதுவரை வெளியே சொன்னதில்லை.

சாமியாரெல்லாம் இப்படித்தான். இதென்ன பெரிய விசயம் னு சொல்லலாம். ஆனால் நித்தியானந்தாவை விட்டுவிட்டு நித்தியின் இந்த முகத்தை மறைத்து இவரை கடவுளாக்க முயற்சி செய்த சாரு நிவேதிதா மேல்தான் எல்லோரும் எரிச்சலும் கோபமுமாக இருக்கிறார்கள். சாருவுடைய கடவுளை கண்டேனில் நித்யானந்தா- ரஞ்சிதா எப்பிசோட் ஒண்ணையும் இவர் எழுதியிருந்தால் இவரை யாரும் குறை சொல்லப்போவதில்லை. ஆனால் சாரு நிவேதிதா இந்த சாமியாரின் பலமுகங்களை மறைத்தது பெரிய குற்றம் என்பதுபோல் பலர் உணர்கிறார்கள். நித்யானந்தாவை திட்டுவதற்கு பதிலாக சாருவைத்தான் அதிகம் திட்டுகிறார்கள்.

பாவம் சாரு! இவருக்கு ரொம்ப கெட்ட நேரம் போல இருக்கு! :( எல்லோரையும் போல் நித்தியானந்தாவை நம்பி மோசம்போனவர்களில் முதல் ஆள் இவர்தானோ என்னவோ!