பதிவுலக மதச்சண்டையால் நன்மைகள்!!

சமீபத்தியப் பதிவுலக நிலவரம் பத்தி எல்லாருக்கும் தெரியும். ஒரு மதத்தவர் செய்யும் தவறுகளை இன்னொரு மதத்தவர், அல்லது தன்னை நாத்திகர் என்று சொல்லிக்கொள்பவர்கள் தோண்டி எடுத்து வந்து, விமர்சிக்கிறாங்க. உடனே பாதிக்கப்பட்ட, விமர்சிக்கப்பட்ட அந்த மதத்தவர், தன்னை விமர்சித்த மதத்தவர்கள் செய்யும் அயோக்கித்தனங்களை எல்லாம் தோண்டி எடுத்து வந்து அவர்களை பழிக்குப் பழி வாங்குவதுபோல் விமர்சிக்கிறாங்க.

ஏன் இப்படி பதிவுலகம் மதநெடியடிக்கிறது? உலகில் பல நல்ல விடயங்களைப் பத்தி பேசலாமே? தம்மதத்தவர் எல்லாரும் யோக்கியர்கள் என்பதுபோல் எதற்கு வாதம் செய்யனும்? என்றெல்லாம்  பலர் வருந்தினாலும், இதில் பல நன்மைகளும் இருக்கத்தான் செய்கிறது.

* யாருக்கோ அநீதி இழைக்கப்படுகிறது. அந்த அநீதி இழைக்கப்பட்டவர் ஒரு மதத்தை சார்ந்தவர். அநீதி இழைத்தவர்கள் வேறொரு மதத்தைச் சார்ந்தவராக இருந்தால், உடனே  பாதிக்கப்பட்டப் பட்டவருக்காக, பாதிக்கப் மதத்தினர், அந்த விடயத்தை பெரிது படுத்தி உலகறிய செய்து, நியாயம் கேக்கிறாங்க. ஆக பாதிக்கப் பட்டவனுக்கு நியாயம் வேண்டுமென்று அதே மதத்தினரால் கேட்கக்படுகிறது. பாதிக்கப்பட்ட ஒருவனுக்கு நியாயம் கேட்பது  ஒரு நல்ல விடயம்தானே? யார் கேட்டால் என்னங்க?

* இன்னொரு சூழ்நிலையில்,  யாரோ ஒரு மதத்தவருக்கு  அநீதி இழைக்கப்படுகிறது. இப்போ அநீதி இழைத்தவர்களும் அம்மதத்தையே சார்ந்தவர்களாகிவிடுகிறார்கள். இந்த சூழலில் அம்மதத்தை சேர்ந்த சிறுபுத்தியுள்ள இவர்கள், அதை மூடி மறைக்கவோ, இல்லைனா கண்டுக்காமலோ போகத்தான் பார்க்கிறார்கள். பாதிக்கப்பட்டவனுக்காக பரிந்துகொண்டுக்கொண்டு போயி தன் மதத்தவர் செய்கிற அயோக்கியத்தனத்தை, மிருகத்தனத்தை வெளியே சொன்னால் நமக்குத்தானே, நம் மதத்துக்குத்தானே அசிங்கம்? என்கிற சிறுமையான மனப்பாங்கு இவர்களுக்கு!  ஆனால், மனசாட்சியுள்ள இவர்கள் உலகுக்குத் தெரியாமல் பாதிக்கப் பட்டவனுக்காக தன் மனதிலேயே வருத்தத்துடன் இருக்கலாம். தன் மதத்தவர் இப்படி தவறு செய்கிறார்களே என வெட்கி தலை குனியலாம். அதனால் என்ன பிரையோஜனம்? தம்மதத்தவரை அயோக்கியனாக நாமே உலகுக்கு காட்டுவது தவறு என்று எண்ணுவது  இவர்களோட அறியாமை. ஆனால், இவர்கள் மதத்தைப் பிடிக்காதவர்கள், இவர்களை பிடிக்காதவர்கள்,  பிறமதத்தவர், பாதிக்கப்பட்ட இவர் மதத்தை சேர்ந்த அந்த பலியானவருக்கு இழைக்கப்பட்ட அநீதிக்காக, வீம்புக்கென்றே  வக்காலத்து வாங்குகிறார்கள்! நியாயம் கிடைக்க உதவுறாங்க. இதனால் பாதிக்கப் பட்டவனுக்கு அதே மதத்தை சார்ந்தவரால் அல்லாமல் பிறமதத்தவரால் நீதி கேட்கப்படுகிறது. அந்த அநீதியை உலகறியச் செய்யப்படுகிறது! நீதியும் கெடைக்கலாம்!

ஆக, மதத்தை தள்ளி வைத்துவிட்டு பாதிக்கப் பட்ட இருவரையும் (ரெண்டு சூழல்களிலும் பார்த்தால்) இரண்டு மனிதர்களாக பார்த்தோமென்றால், அவர்களுக்கு ஏதோ ஒரு மதத்தினரால் நியாயம் கேட்கப்படுகிறது. நியாயம் கிடைக்கிறது.

எல்லா மதத்தவரிலும் மற்றும் நாத்திகர்களிலும் அயோக்கியர் இருக்கத்தான் செய்றாங்க என்பது மனசாட்சியுள்ள எல்லாருக்கும் தெரிந்த உண்மைதான்!

அதனால் இந்தப் பதிவுலக  மதச்சண்டையால் பாதிக்கப் பட்ட நம் மக்களுக்கு ஏதோ ஒரு மதத்தினரால் கிடைக்கும் நன்மையை நினைத்து சந்தோசப் படுவோமா? :)